حەفتەمین کۆنفڕانسێ ناڤدەولەتی لژێر ناڤونیشانێ (دەولەت و میرگەهێن کوردی ل سەردەمێن ناڤەڕاست و نوو) ل زانکۆیا زاخۆ دەستپێکر

ڕۆژا چارشەمبی ڕێککەفتی (٢٠٢٣/٥/٣) ب چاڤدێرییا  ڕێزدار (د. ناظم سليمان عبدالعزيز ) سەرۆکێ زانکۆیا زاخۆ، سەنتەرێ زاخۆ بۆ ڤەکۆلینێن کوردی، فەکۆلتیا زانستێن مرۆڤایەتی ل زانکۆیا زاخۆ حەفتەمین کۆنفڕانسێ خۆە یێ ناڤدەولەتی ب ناڤونیشانێ (دەولەت و میرگەهێن کوردی ل سەردەمێن ناڤەڕاست و نوو) دەستپێکر.
کۆنفڕانس ب جوانترین ڕێزگرتن بۆ گیانێ پاکێ شەهیدێن ڕێکا ڕزگاریخوازا کوردستانێ خولەکەکێ ڕاوەستان دەستپێکر و چەندین پەیڤ هاتنە پێشکێشکرن.

پەیڤا بخێرهاتنێ ژلایێ بەرێز (پ.د. عبدالسلام  نجمدین عبدالله) سەرۆکێ سەنتەرێ زاخۆ بۆ ڤەکۆلینێن کوردی هاتە پێشکێشکرن، ناڤبری د پەیڤا خۆدا باس ل دەستپێکا دامەزراندنا سەنتەری  و کاروبار و کۆنفڕانسێن هاتینە گێران کر، هەروەسا گرنگییا ئەڤی کۆنفڕانسی دا دیارکرن، ژبەرکو بابەتێ کۆنفڕانسێ ئەڤ جارە بابەتەکێ هەستیار و گرێدایی دیرۆکا مللەتەکێ خۆدان مێژوویەکا دیر و درێژە، هیڤی خواست ئەڤ کۆنفڕانسە ببیتە دەرگەهەک بۆ پتر ئاشنابوون ب دیرۆکا مللەتێ کورد د سەردەمێن بووری و نوکەدا.

پاشان پەیڤەک ژلایێ بەرێز (د. ناظم سليمان عبدالعزيز ) سەرۆکێ زانکۆیا زاخۆ هاتە خواندن و د پەیڤا خۆدا بناڤێ زانکۆیا زاخۆ بخێرهاتنا هەمی ئامادەبوویان ژ هەر چار پارچێن کوردستانێ و دەرڤەیی هەرێما کوردستانێ و هەمی مێهڤان ب پلە و پوستێن خۆڤە هاتە کرن، سەرۆکێ زانکۆیێ دەستخۆشی ل ڕێکخەرێن ئەڤی کۆنفڕانسێ گرنگ کر و خواست کارێن ب ئەڤی شێوەیی د بەردەوام بن، بۆ پاراستن و دانە دیارکرنا دیرۆک و چاند و زمانێ مللەتێ مە.

پەیڤا وەزارەتا خواندنا بلند و ڤەکۆلینێن زانستی ژلایێ بەرێز (د. عبدالفتاح عبدالرزاق محمود) بریکارێ وەزارەتا خواندنا بلند هاتە پێشکێشکرن، ناڤبری د پەیڤا خۆدا کەیفخۆشیا خۆ ب ئەڤی کارێ پیرۆز دەربڕی و ئامادەییا وەزراتێ بۆ هەر پێدڤیاتیەکێ ل ئەڤان کارێن ب ڤی شێوەیی نیشاندا و دەستخۆشی ئاراستەی سەنتەرێ زاخۆ بۆ ڤەکۆلینێن کوردی ب سەرۆک و ئەندامێن وێڤە کر.

پەیڤا سەرۆکێ هەرێما کوردستانێ ژلایێ بەرێز (زیرەک کەمال)ڤە ب نوینەرایەتیا سەرۆکایەتیا هەرێمێ هاتە پێشکێشکر، د پەیڤا خۆدا ڕێز و سڵاڤێن سەرۆکێ هەرێما کوردستانێ ڕێزدار (نێچیرڤان بارزانی) گاهاندنە ئامادەبوویان و سوپاسیا سەرۆکاتیا زانکۆیا زاخۆ کر ژبەر داخازنامەیا وان یا فەرمی بۆ سەرۆکاتیا هەرێمێ، هەروەسا دا دیارکرن پێشکەڤتنا هەمی مللەتێن جیهانێ ژ زانکۆیان دەستپێدکەت، ڤێجا ل سەر ملێن مە ئەرکە، ئەم وەک هەرێما کوردستانێ گرنگیەکا ئێکجار زۆر ب زانکۆ و زانین و زانستێ بدەین، ژبەرکو ئەم وەک مللەتێ کورد خودان مێژوویەکا دێرین و تژی سەروەری، دڤێت ئەم ب ڕێکا زانکۆیان پارێزگاریێ لێ بکەین و نەهێلین بەرەڤ ژناڤچوون و نەمانێ بچیت.

پەیڤا سەرۆکێ لیژنەیا زانستییا کۆنفڕانسی ژلایێ بەرێز (پ.هـ.د نزار ایوب)ڤە هاتە پێشکێشکرن، د پەیڤا خۆدا سەرۆکێ لیژنێ باس ل ئامادەکاریێن کۆنفڕانسی و چاوانیا وەرگرتن و ڕێکخستنا ڤەکۆلینێن زانستی ژ ناڤخۆ و دەرڤەیا هەرێما کوردستانێ و وەڵاتێن ئەوروپی و عەرەبی کر و گوت کۆنفڕانسێن سەنتەرێ مە ژبلی لایەنێ زانستی،  یێن بووینە پرەکا باش بۆ پەیوەندیێن مە دگەل ڤەکۆلەرێن مە ل هەر چار پارچەیێن کوردستانێ، هەروەسا دا دیارکرن، کۆ کاروبارێن ئەڤی کۆنفڕانسی ل ساڵا (٢٠٢٢) دەستپێکرینە، و نێزیکی (١٨٦) کورتیێن ڤەکۆلینان هاتبوونە پێشکێشکرن، کۆ هژمارەکا مەزن و دلخۆشکەر بوو، بەلێ ژبەر کاودانێن ڕۆژهەڵاتا کوردستانێ و ئەردهەژا باکوورێ کوردستانێ (١١٥) ڤەکۆلین هاتنە وەرگرتن، پشتی هەڵسەنگاندنێ (٨١) ڤەکۆلین ژلایێ لیژنا زانستی ڤە هاتنە پەسەندکرن و پشکدارکرن د کۆنفڕانسێ مەدا، ڤەکۆلین ب زمانێ کوردی هەردوو تیپێن (عەرەبی، لاتینی) و زمانێن (عەرەبی، فارسی، تورکی، ئینگلیزی) بووینە، هەمی د پەرتووکەکێدا هاتینە چاپکرن و دێ هێنە بەڵاڤکرن.
هەروەسا گوت: جهێ ئاماژە پێدانێیە، کۆ ڤەکۆلەرێن کۆنفڕانسێ مە ژ هەر چار پارچەیێن کوردستانێ و وەڵاتێن (عێراق، تورکیا، ئیران، مصر، جزائیر، سوید) هاتینە.

پەیڤا سەرۆکێ کۆنفڕانسی ژلایێ بەرێز (پ.د. هوگر تاهر توفیق)ڤە هاتە پێشکێشکرن و د پەیڤا خۆدا ناڤبری باس ل مێژوویا مللەتێ کورد و کوردستانێ کر و گوت ب دڕێژاهیا چەندین سەدەیەیێن بووری کوردستانا مە هاتیە داگیرکرن و پارچە کرن، بەلێ کورد خودان ئیرادەیەکا بهێز بوویە و خو لبەر ڤێ داگیرکاریێ گرتیە و سەرێ خۆ بۆ دوژمنی نەچەماندییە، هەتا گەهشتیە ئەڤی سەردەمێ ئەم نوکە تێدا، بەڕچاڤ و دیارە کۆ هژمارەکا زانکۆیێن هەری باش ل سەر ئاستێ ناڤخۆ بیانی ب زمانێ کوردی ئاڤاکرینە و تێدا خزمەتا کوردستان و کوردان دهێتە کرن.

ل دوماهیێ بەڵگە فلمەک هاتە نیشاندان ل سەر میرگەهـ و دەولەتێن کوردی و پاشان دەست ب پێشکێشکرنا پەنەڵان هاتە کرن ژلایێ ڤەکۆلەرانڤە، هەژیە بێژین کۆنفڕانس دێ بۆ دەمێ دوو ڕۆژان ب پێشکێشکرنا ڤەکۆلینان ل جهێن جودا جودا یێن زانکۆیا زاخۆ بەردەوام بیت.